He creyáu una espublización breve ya cenciella pa que la xente pescancie lu que yía'l Ramu Llïonés de Nadal. He sigío l'esquema de la espublización que tien Raigañu nel suo blog, pa ampliare información debéis acudire a eilla, abaixu vos deixaré los enllaces. Asperu que vos resulte útil.
Hestoria
En suos oríxenes el ramu yera una simple rama d'un árbol, se creye que cun él se rindía culto a la fertilidá ya tamién que yera un símbolo del preludio de la primaveira. Cuna chegada de la relixión cristiana'l ramu alquirióu una nueva sinificancia altravés de las pastouradas.
El "Abetu de Nadal" ta direutamente rellacionáu cul Ramu Llïonés, esti gamoneáu peligru nel siglu XX d'esaparecere pula chegada d'outras tradiciones cumu la del abetu. El Ramu Llïonés se calteneóu nas zonas de mountaña más aisllás pulu que se consideróu dalgu rural ya ensín emportancia. Gracias al trabayu de mueitas personas guei'n día tamos viendu ca vegada más ramos pur tou Llïón.
Tipos de ramos
El ramu más común yía'l triangular que podemos vere'n mueitos llugares de Llïón, peru esiste variedá asgaya de ramos llïoneses, yía mui cumplicáu facere un catálogu cumpletu de toos los tipos de ramos qu'hai, peri estos son dalgunos:
Ramu Vexetal
Se trata d'un piqueñu árbol que se decora'n época de Nadal. Yía mui común en laurel nel Bierzo.
Ramu Triangular
Nun solu esiste'l ramu d'un triángulo, pueden tare compuestos cun dous o enclusu tres triángulos pa suxetare miyor las velas. Tamién podemos alcontrare ramos cun el triángulo invertío. La decoración yía mui variada, falaré d'eilla dempués.
Ramu de Cola de Pavu Rïal
Esti ramu se asemeya al triangular, podría sere una evolución. Nun tá coronáu pur un triángulo sinon pur un semicírculo, pur esu se connoce cumu cola de pavu real.
Ramu de Rastru
Debe'l suo nome a la ferramienta que toos connocemos ya que se utiliza sobru tou na llabranza pa recoyere la yerba o las fueyas. Tien una estrutura reutangular ya las velas tan toas sigías a la mesma altura, variandu'l numberu d'eillas d'unos ramos a outros.
Ramu Cilíndricu
Xeneralmente estos ramos tienen dous corras horizontales unidas (cumu si fuera una rueda) al mástil. Son mui comunes na comarca d'Omaña.
Ramu Cúbico
Esti yía'l ramu típico de la zona de Prioro. Ta formáu pur dous cuadráos.
Outros ramos
Esisten outras formas menos comunes ente los ramos, cumu pur exemplu los que tien forma piramidal o cónica.
Adornos
Dalgunos de los adornos que pueden chevare'l Ramu Llïonés de Nadal son:
Velas
Son símbolo de la lluz, su utilizan pa cellebrare'l entamu de las horas solares más llargas. Se ponen seyes velas a ca llau. Dalgunos etnógrafos creyen que las douce velas pueden facere referencia a los meses del annu.
Vexetales
Se utilizan p'alcordarse del orixen del ramu. Se decora cun una piquenna ramina na punta del triángulo, suele sere dalgún árbol de fueya perene. Yía común tamién pintare'l ramu cun verde ya coloráu pur los frutos que podría dare'l árbol.
Cintas
Las cintas de tela pueden sere de diversidá asgaya'n cuantu a colores ya formas. Pueden utilizarse tamién pa suxetare outras ofrendas. En ocasiones se sustituyen pur llana o filos de colores.
Frutos d'hibiernu
Cumu pomas o naranxas, enclusu frutos secos cumu las castannas.
Dolces
Típicos de la Nadal cumu rosquillas o carambelus.
Encaxes
El ramu siempres cheva telas nidias cun puntillas o encaxes.
Papeles
Pueden facerse adornos cun papel de colores cumu flores, caenetas...
Armazón
Dalgunos ramos yá son una oubra d'arte ensín dengún de los elementos mencionáus antias, purque tien un armazón talláu, pintáu, barnizáu... nel que pueden apaecere diversas formas.
Asperu que vos haya resultáu d'utilidá, vos deixo tamién un vídiu mui enteresante.
Bonas seras o nueches.
Guei ñace esti nuevu blog tituláu Trasgu Llocu. Eiquí 'l Trasgu dirá espublizandu escrítos de diversidá asgaya, cumu pur exemplu cuentos, cantares populares, traduciones, encluso críticas políticas, sociales... peru siempres en nuesa llingua, el llïonés.
Quieru sobru tou dare ha connocere la cultura del País Llïonés, ya asina defendere los nuesos entereses.
Asina que si yes llïones sige al Trasgu nesti blog o pur Twitter ( @TrasguLlocu ).
Podéis contautar cunmieu pur el sigiente correu eletrónicu trasgullocu@gmail.com
